Ohin, loron 14 Outubru 2016, Instituto do Petróleo e Geologia – Instituto Público (IPG) hamutuk ho Dirasaun Nasional Meteorolojia i Geofisika (DNMG) halao Lansamentu konaba monitorizasaun seismometru ba Rainakdoko no Tsunami ba 24 oras kada loron-loron, iha edifisiu IPG Delta-1 Aimutin. Oficialmente lansamentu ida ne’e halao husi Sr. Presidente IPG ho Diretur Jeral Transporte no Komunikasaun  (Sr. Joanico Gonsalves) ne’ebe’ maka akompaña mos husi Vice Presidente IPG, Diretur Risku Jeolojia no Diretur  Meterolojia Geofisika nomos komitivas tomak husi Instituto do Petróleo no Geologia no Dirasaun Nasional Meterolojia i Geofisika (DNMG).

Iha lian makloke nebe’e hato’o hosi  Sr. Presidenti IPG katak “dadus monitorijasaun rainakdoko importante tebes ba IPG hodi halo estudu saintifiku nian”, ema nomeru dahuluk iha IPG ne’e mos hatutan tan katak “karik loron ida kustu konstrusaun sei ki’ik liu fali kustu ou gastu ba manutensaun, wainhira ita la tau atensaun ba asuntu ida ne’e”.

Iha intervensaun Sr. Diretur Jeral Transporte no Komunikasaun hatete katak “hau apresia tebes ba kooperasaun nebe’e iha entre DNMG no IPG iha nivel tekniku nian” alein de ne’e ulun bo’ot hosi Diretur Nasional Transporte no komunikasaun ne’e koalia mos konaba importansia sistema monitorijasaun rainakdoko no Tsunami iha Timor Leste.

Iha Lansamentu ida ne’e, iha mos aktividades seluk hanesan; apresentasaun badak hosi Diretur Risku Jeolojia (DRJ-IPG) konaba sistema monitorizasaun,  demostrasaun oinsa halo monitorizasaun ba eventu Rainakdoko no Tsunami iha rejiaun Timor nian iha tempu real nebe’e hato’o hosi ofisial tekniku DRJ-IPG, Ofisial tekniku DNMG nian koalia mos konaba sistema no prosedur dezamina informasaun ba publiku. Alende lansamentu ba sistema monitorizasaun, halao mos konferensia pers ida konaba servisu hamutuk entre IPG (MPRM) no DNMG (MOPTC).